Randai SUTAN PAMENAN

Berdasarkan cerita (kaba) yang asli dan disusun kembali
oleh:
Wisran Hadi
Pelakon:
1. SUTAN PAMENAN
2. TUANKU RAJO TUO (Ayah Sutan Pamenan)
3. RAJO ANGEK GARANG
4. BUJANG SALAMAIK
5. INYIAK RANG PALADANG
6. RANIK JINTAN (Tunangan Rajo Angek Garang)
SARATO
URANG-URANG DI GALAGGANG

I.
RANDAI PEMBUKAAN
Kalibuik kapa nak rang Tiku
Kapa nakodo di muaro
Dijapuik kaba rang daulu
Kaba Tuanku Rajo Tuo
Bapak dek Puti Sari Malu
Junjuangan Puti Linduang Bulan
Urang tasabuik sajak daulu
Urang kiramaik sati pulo
Hati di dalam raso ka ramuak
Pikiran indak namuah tanang
Curito habih gurindam masuak
Sinan bakato Tuanku Rajo Tuo

TUANKU RAJO TUO;
Denai nan banamo Tuanku Rajo Tuo
Tuo baasa bausali
Tuo jo adaik jo limbago
Tau diereang dengan gendeang
Tau dirantiang nak kamancucuak
Takilek rupo dalam camin
Denai dibaliak itu pulo
Aluran badan diri denai
Denai baranak duo urang
Sikua jantan sikua batino
Nan gadang banamo Sutan Pamenan
Nan ketek banamo Puti Sarimalu

Tantangan diri Sutan Pamenan
Siang bamain sipak rago
Malam mamancak jo basilek
Gilo bahuru hura sajo
Dek bapak kayo mande batuah
Mamak disambah urang pulo
Kok tantangan Puti Sarimalu
Iduik dianjuang paranginan
Pandai batanun jo basuri
Limpapeh rumah nan gadang
Sumarak dalam nagari
Unduang-undang ka sarugo
*

II.
RANDAI
*
SUTAN PAMENAN;
Manolah ayah kanduang denai
Agak kamari molah tagak
Ado mukasuik nak disampaikan
 
TUANKU RAJO TUO;
Anak kanduang Sutan Pamenan
Apo sabab ayah dipanggie
Curai papakan bakeh ayah
Nak sanang di dalam hati
Nak sajuak dalam kiro-kiro

SUTAN PAMENAN;
Makonyo denai ayah imbau
Lah tadanga galanggang rami
Eten di ranah Kayutanam
Galanggang Rajo Angek Garang
Bari izin denai di ayah
Pai manampuah galanggang nantun

TUANKU RAJO TUO;
Galanggang Angek Garang nan kadituruik?
Angek Garang lain adaiknyo
Urang mamakn masak matah
Urang indak tahu salah jo bana
Maukua panjang ka inyo
Manimbang barek ka inyo

SUTAN PAMENAN;
Ayah kanduang janyo denai
Bari izin molah denai dek ayah
Pado denai lalok dianjuang
Eloklah mancaliak galanggang urang

TUANKU RAJO TUO;
Jiko baitu kato anak kanduang
Dangakan bana nasehat ayah
Kok sampai anak di sanan
Iduik di kampuang urang
Jan bak ayam kuriak panjang ikua
Tampan paukua bayang-bayang
Panjang tajelo urang karek
Tak usah tinggi dari pucuak
Tinggi pucuak biaso patah
Tak usah randah dari tunggua
Randah tak ado tampek jatuah
Ikan rayo dilautan
Garundang rajo kubangan
Sutan bana anak di kampuang
Namun di rantau dagang juo
Paciklah baro di tampuruang
Abu nan jaan anak buang
Pagang pataruah ayah kanduang
Malu nan jaan dibao pulang
Dari parak handak ka pakan
Tibo di balai balilah samba
Budi rang tuo jaan dilupokan
Sampai mati tatap di kana

SUTAN PAMENAN;
Apo nan kajadi pitaruah ayah
Denai pacik dipegang arek
Siang ka denai patungkek
Malam ka denai pakalang
Alah ka sanang hati ayah.
*

III.
RANDAI
Lah bajalan Sutan Pamenan
Diiliekannyo labuah nan panjang
Manuju ranah Kayutanam
Ka galanggang Rajo Angek Garang
Dek lamo lambek di jalan
Lah tibo candonyo kini
Galanggang rami alang kapalang
Sinan taguncang dalam diri

RAJO ANGEK GARANG;
Manolah kalian nan di galanggang ko
Danga kecek den elok-elok
Simakkan bana baiak-baiak.
Aden banamo Rajo Angek Garang
Batarak di Bukik Siguntang-guntang
Supayo nak rami galanggang nangko
Molah kito bamain sipak rago

RAJO ANGEK GARANG MAIN SIPAK RAGO JO URANG
BANYAK. RAJO ANGEK GARANG TAJATUAH, URANG
BASORAK KASADONYO.
RAJO ANGEK GARANG TAGAK, BERANG MANCALIAK
SUTAN PAMENAN SATO PULO BASORAK.
RAJO ANGEK GARANG;
E, waang paja ketek!
Sato pulo manyorak an den!

SUTAN PAMENAN;
Ampunlah ambo dek tuanku
Ampun baribu kali ampun
Bukan ambo surang nan basorak
Urang basorak kasadonyo

RAJO ANGEK GARANG;
Waden jatuah waang kecek an cubadak lareh!
Aden ko bukan cubadak! Waden tu bukannyo jatuah!
Tapi waden jatuah tu dek barek badan den surang
Waang ko anak bincacak!
Anak bincacak jo bincacau
Anak singiang-ngiang rimbo
Anak kaladi taleh ladang
Anak sicangkiang panarahan
Anak sariduang sarok lawik

SUTAN PAMENAN;
Usah tuanku tadorong bana
Urang mandoroang gadang kanai
Urang panggamang mati jatuah
Urang pandingin mati anyuik

RAJO ANGEK GARANG;
Usah marandang di kuali
Sambirek jalo ka tapian
Usah waang ulang duo kali
Maramang bulu kuduak den mandangakan
Anak cacak samo cacak
Samo batalua diateh pagu
Kok iyo waang samo bagak
Senseangan molah langan baju

SUTAN PAMENAN;
Kok iyo kareh bana hati Tuanku
Molah kito cubo agak sajamang
Untuak pamasiah-masiah langkah

RAJO ANGEK GARANG BASILEK JO SUTAN PAMENAN.
SUTAN PAMENAN KASUDAHANNYO DAPEK DITANGKOK
DEK RAJO NAN PANJANG. SUTAN PAMENAN
MARANUANG MINTAK AMPUN.
SUTAN PAMENAN;
Ampun. Ampun tuanku.

RAJO ANGEK GARANG;
Lai ka mintak ampun juo waang!
Bangang! Awak ketek masuak pulo ka galanggang!
Baru waang tahu kini, sia waden!
Iko nan banamo Rajo Angek garang
*

IV.
RANDAI
Lah kalah Sutan Pemenan
Kalah dek Rajo Angek Garang
Sutan tatangkok maso itu
Tangkok nan indak talapehan
Sinan tamanuang Sutan Pamenan
Malu kamano kadilapeh an
Panek bamanuang inyo bapikie
Cakak nan musti babalehan
Kaba baraliah hanyo lai
Namun baraliah sinan juo
Dijapuik kaba Rajo Tuo
Lah tasorok darah di dado
Antah ko apo nan tajadi
Dipanggie Bujang Salamaik

TUANKU RAJO TUO;
Manolah buyuang Bujang Salamaik
Tagak ka mari molah buyuang
Ado nak ka den sampaian

BUJANG SALAMAIK;
Ampunlah denai dek tuanku
Ampun baribu kali ampun
Mandanga imbauan dari Tuanku
Tasirok darah di dado
Mandanyuik ka ubun-ubun
Mambaleh ka ampu kaki
Guimanta sabatang tubuah
Badan bak raso bayang-bayang

TUANKU RAJO TUO;
Ikolah waang Bujang Salamaik
Bukan Salamaik caro kini
Tapi salamaik urang daulu
Alun dipanggia alah datang
Alun diimbau alah tibo
Kini baitu lah dek waang
Pai japuik Sutan Pamenan
Antah baa kolah inyo kini
Japuik tabao kini juo
Eten ka ranah Kayutanam
Galanggang Rajo Angek Garang

BUJANG SALAMAIK;
Kalau baitu kato tuanku
Samantaro hari lai alun malam bana
Denai bajalan hanyo lai.
*

V.
RANDAI
Rundiang putuih kato salasai
Babaliak pulang Sutan Pamenan
Dijapuik dek Bujang Salamaik
Ka galanggang Rajo Angek Garang
Dek lamo lambek di jalan
Alah katibo hanyo lai
Mananti Tuanku Rajo Tuo
Sinan tabukak kato-kato

TUANKU RAJO TUO;
Ayah mandapek kaba buruak
Kaba dibao urang lalu
Tantangan diri anak kanduang
Lah tajadi silang salisiah
Iyo jo Rajo Angek Garang
Tapi baalah mangatokannyo
Pitaruah ayah indak waang pacik
Badan waang juo manangguangkan

SUTAN PAMENAN;
Alu tasanda pado dindiang
Jikok tasandi di balakang
Buliah diambiak urang lalu
Malu tacoreang pado kaniang
Jikok dicoreang dibulakang
Bisa ditutuik kain jo baju
Namun samantangpun baitu
Bari izin denai dek ayah

Pai mancari ilimu bakeh tagak
Iyo ka bakeh inyiak paladang
Untuang tabangkik batang tarandam

TUANKU RAJO TUO;
Jiko baitu kato nak kanduang
Itulah kato sabananyo
Kok mangaruak iyo sahabih gauang
Kok manyauak takasiak bulan
Indak nan lakang dek paneh
Indak nan lapuak dek ujang
Alah ka jaleh tu dek waang

SUTAN PAMENAN;
Kalau baitu kato ayah
Denai bajalan hanyo lai
*

VI.
RANDAI
Lah bajalan Sutan Pamenan
Manuju Inyaik rang paladang
Mancari ilimu bakeh tagak
Pambangkik batang tarandam
Lah diiliekan labuah nan panjang
Labiah pendek liku baliku
Masuak rimbo kalua rimbo
Masuak kampuang kalua kampuang
Lah basuo jo Inyiak Rang Paladang
Sutan baraja bamacam ilimu
Sudah baraja bilangan musim
Maso ka pulang hanyo lai.

INYIAK RANG PALADANG:
Lah anam musim anak di siko
Baraja babagai macam ilimu
Kok iyo waang ka pulang bisuak
Ikolah pasan dari inyiak
Jampang sakik indak taubek lai
Ambiaklah aie agak sacangkie
Bacolah manto nan bak iko
Sabik ketek panyabik padi
Panyabik padi sado nan rabah
Ubek lakek panyakik pai
Pai kabukik Sabarullah
Bajalanlah tujuah hari
Ndak buliah kito basuo

SUTAN PAMENAN;
Sagalo ilimu nan inyiak agihan
Ambo pacik arek diganggam taguah
*

VII.
RANDAI
Lah sudah manuntuik ilimu
Babaliak molah Sutan Pamenan
Iyo ka ranah Camin Taruih
Nak manamui ayah kanduang

SUTAN PAMENAN;
Manolah ayah kanduang denai
Lah babaliak denai manuntuik ilimu
Iyo dari inyiak urang paladang
Nan sakarang kini nangko
Denai nak babaliak ka Kayutanam
Ka galanggang Rajo Angek Garang
Jikok kandak buliah pintak balaku
Tantu lai tajajak tanah tapi
Maklum ayah tantang itu

TUANKU RAJO TUO;
Kilek camin lah ka muko
Kilek baliuang lah kaki
Harima mati maninggakan balang
Gajah mati maninggakan gadiang
Ayah lah maklum tantang itu
Namun samantangpun baitu
Adat di lawik bajuru mudi
Adat di galanggang ba juaro
Adat di kampuang bapangulu
Dima aie disauak, di sinan bumi dipijak
Dima sumua dikali di sinan rantiang dipatah
Hanyo sakitu dari ayah
Pulang maklum pado nak kanduang

VIII.
RANDAI
*
DI GALANGGANG RAJO ANGEK GARANG.
URANG BAMAIN BABAGAI PAMAINAN
SUTAN PAMENAN DATANG JO BUJANG SALAMAIK,
MANGAPIK AYAM KETEK
RAJO ANGEK GARANG;
Baa kok waang datang kamari
Nak maadu ayam roman iko
Ayam waang ketek saketek dari balam
Gadang saketek dari puyuah
Lah ka waang adu pulo jo ayam den
Lai tahu waang ndak
Ayam den sagadang kambiang kekah
Ayam batigo badunsanak
Sikua jadi musang
Sikua jadi alang
Sikua jadi ayam

SUTAN PAMENAN;
Kok ketek bana ayam denai
Lai ko talok dek ayam Tuanku
Namun sabalun ayam diadu
Denai batanyo sungguah-sungguah.
Manang kan lai manarimo
Kalah kan lai mambaie

RAJO ANGEK GARANG;
Tasarah dek waang!

SUTAN PAMENAN;
Kalau baitu kato Tuanku
Marilah kito padan ayam kito
Sabalun ayam kadibulang
Ikolah intan tigo boto
Kataruah dari ambo
Mano taruahan dari Tuanku.

RAJO ANGEK GARANG;
Ikolah pitih dari waden
Alah ka sanang hati waang
Capek lapehan ayam waang tu
Nak capek pulo patah lilienyo

SUTAN PAMENAN;
Manuruik aturan di galanggang
Taruhan harus satimpalan
Dibandiang jo pitih taruhan Tuanku
Daripado intan dipataruahkan
Jo pitih nan sabanyak itu
Labiah elok intan ko den buang ka lautan

RAJO ANGEK GARANG;
Banyak curito waang
Nan jaleh ayam ko diadu dulu
Kok manang waang
Ambiak pitih ko, ambiak si Ranik Jintan
Tunangan den tambahannyo

ADU AYAM, ANTARO AYAM SUTAN PAMENAN JO AYAM
RAJO ANGEK GARANG. AYAM RAJO ANGEK GARANG
MATI

SUTAN PAMENAN;
Kini baitu lah dek Tuanku
Lah samo-samo kito like ayam lago
Manang kalahnyo lah jaleh pulo Bak janji kito samulo
Manang iyo ka maelo
Kalah iyo ka mambaie
Tandonyo ambo nan manang
Tantu taruhan ambo bao
Manyo taruhan dari Tuanku

RAJO ANGEK GARANG;
Indak waang danga dari tadi
Kalah indak mambao
Manang indak manarimo
Taruhan apo ka waang mintak
Antah kok tumik na kadapek dek waang

SUTAN PAMENAN;
Kalau baitu pandapek Tuan
Kalah jo manang tak ditimbang
Bia bacarai lihie jo badan

RAJO ANGEK GARANG;
Banyak bana curito waang!
Dari Mahek ka Lubuak Aluang
Singgah ka pakan Balai Batu
Aie pake nasi baliuang
Karambia raso goreng paku

SUTAN PAMENAN;
Kalau iyo molah baitu
Pucuak dicinto ulam tibo
Sumua dikali aie datang
Rancak bapikie Tuanku daulu
Indak ko ibo angok ka malayang

RAJO ANGEK GARANG;
Cukuik!
Jaan waang sambuang kato waang tu lai!
Bareh sipuluik dalam kuali
Usah dilatak ateh dulang
Sujuik suruik waang kumbali
Kok indak angok malayang

SUTAN PAMENAN;
Tuan iyo gadang karengkang!
Banyak curito daripado karajo
Kok iyo tuan laki-laki
Mulailah di sinan dek tuanku
Nak denai garik pulo dari siko

RAJO ANGEK GARANG BACAKAK JO SUTAN PAMENAN
SAMO-SAMO SANTIANG
TANYATO KASUDAHANNYO RAJO ANGEK GARANG,
MAMARINTAHAN DUBALANGNYO NAN BARAMPEK
MANGAROYOK SUTAN PAMENAN.
SUTAN PAMENAN MANGALUAKAN ILIMUNYO.
KALUA DARI KURUANGAN DUBALANG NAN BARAMPEK.
KASUDAHANNYO DUBALANG SAMO DUBALANG TU
BACAKAK BABUNUHAN.
RAJO ANGEK GARANG KASUDAHANNYO MATI JUO.
RANIK JINTAN DATANG.
MANANGIH DI DAPEK MAIK TUANKU RAJO ANGEK
GARANG NAN TABUJUA DI TANAH

RANIK JINTAN;
Manolah Tuanku Rajo Angek Garang
Apokoh garan nan alah tajadi
Baa kok tabujua maik tuan disiko
Ondeh tuanku Rajo Angek garang
Lorong di badan diri ambo
Sudahlah garak jo takadia
Sadang arek bincano tibo
Litak tubuah lamahlah tulang
Parpati batalua ateh tanah
Ka Sikabu denai baokan
Tuan bakubua di tanah sabingkah
Denai di mano ditinggakan
*

IX.
RANDAI
Kain batiak tanun Palembang
Dipakai anak Muko-muko
Ulah parangai Angek Garang
Indak badan ka cando iko
Alah bajalan Ranik Jintan
Jalan tak tahu ka tujuan
Lah panek dek bajalan
Basuo jo Sutan Pamenan

RANIK JINTAN;
Manolah Sutan Pamenan
Apokoh sabab karanonyo
Mako dibunuah tunangan ambo
Jaleh inyo tampek balinduang
Tampek balinduang badan ambo

SUTAN PAMENAN;
Manolah Puti Ranik jintan
Tunangan dek Tuanku Angek garang
Dengan dek puti denai uraikan
Simakkan bana jaleh-jaleh.
Salaruik salamo nangko
Tuanku Rajo Angek Garang
Indak ado urang barani malawan
Inyo barajo di hatinyo
Intyo basutan dimatonyo
Banyaklah urang nan taniayo
Di ma pasa sinan maribuik
Nan ma nan rancak punyo inyo
Nan ma nan katuju inyo bao
Diajak musyawarah matonyo merah
Utangnyo sabalik pinggang
Sabanyak bintang dilangik
Sabanyak kayu nan lareh
Baa dek kito mambiakannyo

RANIK JINTAN;
Kalau baitu kato Sutan
Denai lah maklum tantang itu
Tapi samantangpun baitu
Inyo kan tampek denai balinduang
Kok utangnyo nan ka Sutan sabuik
Jo apo ka denai baie

SUTAN PAMENAN;
Tak ado kusik tak salasai
Tak ado karuah tak kajaniah
Usalhalah cameh jo buruang tabang
Panek tabang ka inggok juo
Usah cameh katingga surang
Kok nan ilang ado ka gantinyo

RANIK JINTAN;
Mandanga kato dari Sutan
Raso barangin tangah hari
Raso sakik ado ubeknyo
Raso kalam lai ka tarang
Tapi samantangpun baitu
Barek rasnyo mangatokan
Takuik takanai duo kali
Bak cando urang kini
Lain kulik lain isinyo

SUTAN PAMENAN;
Salaruik salamo nangko
Lori bajaln bajalan ateh kawek
Sajak mulo kito basuo
Raso dihati nak kamamikek
Pikek dimano kadipasang
Rasonyo hari nan lah paang
Raso marusuah dalam hati
Pikek tapasang buruang kok tabang

RANIK JINTAN;
Kalau iyo baitu janyo Sutan
Sutan nak kamamikek balam
Carikan denai alu nan bapucuak
Carikan denai lasuang nan baurek
Jikok lai dapek dek Sutan
Baru denai dapek dek Sutan

SUTAN PAMENAN;
Kok tak ado pitulo Jawa
Pitulo paik denai tukakan
Kok tak dapek dicari di dunia
Ka langik denai carikan
Manunggu adiak sakutiko
*

X.
RANDAI
Kain batiak raginyo cindai
Tanunan anak Palambaian
Ombak cadiak galombang pandai
Alun nan indak kanampak an
Laruiklah samuik dek manisan
Serak talendo dek rang mudo
Baramuak lawuik kintyak pamenan
Tagah dek ombak ratok sajo

SUTAN PAMENAN;
Tantangan pintak jo pinto adiak
Lah denai dapek barang nantun
Ikolah alu nan bapucuak
Ikolah lasuang nan baurek
Alah ka sanang hati adiak

RANIK JINTAN;
Bukan iko alu nan bapucuak
Batang rabuang toloang ambiak an
Bukan iko lasuang nan baurek
Sayak tampuruang tolong barikan

SUTAN PAMENAN;
Usah adiak tingkah batingkah
Danga dek adiak pantun sabuah
Sajak denai gubalo itiak
Ka Bayang denai dakikan
Indak den ka Berok lai
Sajak denai cinto ka adiak
Sumbayang lah den karajoan
Indak den baampok lai
Usah disabik padi salibu
Jikok disabik lukolah kaki
Tasabik pucuak daun ampalam
Denai mancaliak dalam saribu
Adiak surang nan tampek hati
Nan lain buliah denai haramkan

RANIK JINTAN;
Ayam kuriak lambaian taduang
Ikua manjelo masuak padi
Ambiak tampuruang bari makan
Tujuah bukik sambilan gunuang
Tuan nan surang dalam hati
Nan lain dapek denai lupokan

SUTAN PAMENAN;
Kok ka Piladang ka babelok, diak oi
Masuak kualo Aie Haji
Jalan nak urang ka Singgalang
Kalau bak itu kato adiak
Lah samo sanang dalam hati
Molah kito samo pulang
*

XI.
RANDAI PENUTUP
Batusangka balantai batu
Parak Juao labuah basilang
Randai sakitu lah daulu
Talempong mairiang di balakang
Kok lai ado sumua di ladang
Buliahlah kito manumpang mandi
Mandi barang ka tapian
Kok lai umua samo panjang
Randai nan lain diulang lai
Disiko dulu diantian
*
tamat

Artikel Terkait